Не забірай жыцьцё!
2016 26/02

lawtrend_asambleya

Асамблея няўрадавых дэмакратычных арганізацыяў і Цэнтар прававой трансфармацыі падрыхтавалі гадавы агляд “Свабода асацыяцыяў і праўны стан некамэрцыйных арганізацыяў у Беларусі” за 2015 год.

У дакумэнце аналізуецца разьвіцьцё заканадаўства ў сфэры некамэрцыйнага права ў мінулым годзе, акрэсьленыя асноўныя абмежаваньні, зь якімі сутыкаюцца некамэрцыйныя арганізацыі (НКА), прадстаўленыя статыстыка па рэгістрацыі новых НКА і агляд практыкі адмоваў у рэгістрацыі.

  • У 2015 годзе асноўныя заканадаўчыя зьмены, якія закранаюць інтарэсы НКА, тычыліся прававога рэгуляваньня атрыманьня замежнага фінансаваньня. Пры гэтым аўтары агляду падкрэсліваюць, што ў цэлым засталіся бязь зьменаў усе ранейшыя прававыя абмежаваньні й правапрымяняльная практыка па ўсіх аспэктах стварэньня й дзейнасьці НКА.

Дэкрэт прэзыдэнта №5 ад 31 жніўня 2015 году “Аб замежнай бязвыплатнай дапамозе”, які набывае моц 4 сакавіка 2016 году, у цэлым пакінуў ранейшы парадак атрыманьня замежных ахвяраваньняў, які вымагае іх абавязковай папярэдняй рэгістрацыі, захавалася і крымінальная адказнасьць за парушэньне гэтага парадку. Летась адбылося зьмяненьне прававога рэгуляваньня ды іншага віду замежнага фінансаваньня — міжнароднай тэхнічнай дапамогі. У гэтай частцы працэдура таксама засталася ранейшай, хоць і былі зьнятыя некаторыя бюракратычныя бар’еры. У Беларусі створаны Цэнтар міжнароднай тэхнічнай дапамогі Эўрапейскага Зьвязу, а таксама прадугледжанае стварэньне Каардынацыйнага савету пры камісіі па пытаньнях міжнароднага тэхнічнага супрацоўніцтва з удзелам прадстаўнікоў дзяржаўных ворганаў, донараў міжнароднай тэхнічнай дапамогі, няўрадавага сэктару. Рэформа падатковага заканадаўства пакінула ў сіле выбарачны падыход, калі Падатковы кодэкс называе пайменна тыя НКА, ахвяраваньні для якіх выключаюцца для беларускіх донараў зь іх падаткаабкладальнай базы (пералік такіх НКА у кодэксе быў пашыраны нязначна).

  • Агляд адзначае, што прыняцьцё гэтых заканадаўчых новаўвядзеньняў адбылося без сапраўднага абмеркаваньня з зацікаўленымі суб’ектамі: працэс камунікацыі дзяржаўных ворганаў і заканадаўцаў з арганізацыямі грамадзянскай супольнасьці па пытаньнях рэфармаваньня заканадаўства, што закранае іхную дзейнасьць, часьцей за ўсё адбываецца ў аднабаковым фармаце, прапановы зацікаўленых НКА разглядаюцца фармальна й ня ўлічваюцца ў поўнай меры.

Парадак дзяржаўнай рэгістрацыі грамадзкіх аб’яднаньняў, партыяў, фондаў застаецца складаным і пакідае прастору для адвольнай адмовы ў рэгістрацыі любой новастворанай арганізацыі на малазначных падставах. Ворганы юстыцыі адмаўлялі ў рэгістрацыі шэрагу грамадзкіх аб’яднаньняў, якія цягам 2015 году падавалі дакумэнты для рэгістрацыі.

Захоўваецца забарона на дзейнасьць НКА безь дзяржаўнай рэгістрацыі, за якую прадугледжаная крымінальная адказнасьць па артыкуле 193-1 Крымінальнага кодэксу, які прадугледжвае пакараньне да двух гадоў пазбаўленьня волі. Нягледзячы на адсутнасьць новых крымінальных справаў па гэтым артыкуле, сама наяўнасьць забароны і пагроза пакараньня істотна абмяжоўвае свабоду асацыяцыяў і магчымасьці для дзейнасьці арганізацыяў грамадзянскай супольнасьці.

 

ДАДАТКІ:

 

Паводле “Асамблея НДА”
Падрыхтаваў Алесь ЛЕТА,
Беларускі Праўны Партал,
www.prava-by.info

Цэтлікі: , , , , , ,

One thought on “Ці адбыліся зьмены ў свабодзе асацыяцыяў цягам 2015 году? (дакумэнт)”

  1. AL Łapicki says:

    “Таптаньне на месцы” альбо … Свабода асацыяцыяў, як і іншыя канстытуцыйныя правы й свабоды, – нам толькі сьніцца.

    Ідэолягі ў выканкамах (а гэта – “колер” цяперашняе ўлады), якія нават кіруюць судамі, перакананыя ў тым, што адзначаныя ў Асноўным Законе дзяржавы Беларусь палажэньні – толькі далёкая й верагодная, дэкляраваная “будучыня”, а не законная, вызначаючая “канстытуцыйны лад краіны” і ейны “праўны стан”, сапраўднасьць. (!?)

    І з гэтага трэба, так вынікае, сыходзіць, каб зразумець хто намі кіруе, і дзе мы сёньня насамрэч ёсьць…

    – Усе гэтыя канстатацыі ня маюць нічога агульнага з рэальнасьцю – усе гэтыя вашыя дэмакратычныя свабоды й г.д., адзначаемыя ў Канстытуцыі – гэта далёкая мэта (верагодна, як камнізм для іххх калісьці?), а не рэальнасьць.

    – Дык калі ў нас Канстытуцыя – гэта “дакумэнт з будучыні” (!), які ж у нас сёньня “канстытуцыйны лад”? Які ў дзяржаве закон – Асноўны?! А можа ў разуменьні ідэолягаў Беларусь зусім не дзяржава з уласнай Канстытуцыяй, а грамадзяне Беларусі – “недаграмадзяне” і ахоўваць іх тут таму й няма каму?! Бо ў іх жа няма, як вынікае, канстытуцыйных правоў і свабодаў у рэальнасьці – яны толькі задэкляраваныя ў беларускай Канстытуцыі. Таму і ахоўваць тут няма што й каго …

    Канешне ж, ім з кабінэтаў, дзе ўсё вырашаецца за нас (нават на быццам бы “выбарах”), безумоўна, “лепей бачна”! Толькі ў такім выпадку – яны асноўныя злосныя і наўмысныя парушальнікі Асноўнага Закону, а таксама -і асноўная небясьпека для “канстытуцыйнага ладу” нашай краіны як незалежнай дзяржавы.

    Сапраўды, з такім мысьленьнем – толькі ў калгасе “Чырвоны лапаць” – гусей пасьвіць ды бульбу перабіраць, а не “дзяржаўнай ідэалёгіяй” займацца!

    Такія – у першыя ж хвіліны любой акупацыі першымі ж падпішуцца пад любым “правільным дакумэнтам” і здадуць Беларусь оптам ці ў розьніцу ў якасьці васала… Бо ні Радзімы ў іх няма, ні сваёй незалежнай эўрапейскай дзяржавы, ні Асноўнага Закону гэтай дзяржавы…

    (Вельмі асацыятыўнае… прабеларускія “асацыяцыі” і ня толькі)

Leave a Reply

Your email address will not be published. Required fields are marked *


*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>