Актывіст Аб’яднанай грамадзянскай партыі (АГП) Эдуард Нелюбовіч зьвярнуўся ў Камітэт ААН па правах чалавека з скаргай на забарону чыноўнікамі трох мірных сходаў.

15 сакавіка 2014 году ўлады не дазволілі пікет супраць парушэньня гарвыканкамам правоў і свабодаў грамадзянаў;

7 лістападу – вулічнага шэсьця супраць Расеі ў сувязі з падтрымкай сепаратызму ва Ўкраіне;

22 лютага 2015 году – флэшмобу сьвяткаваньня гадавіны уцёкаў у Расею экс-прэзыдэнта Ўкраіны.

Спачатку актывіст спрабаваў дамагчыся праўды на нацыянальным роўні, “але беларуская Фэміда стала на бок чыноўнікаў”.

“На бок чыноўнікаў стала й Генэральная пракуратура, куды я зьвяртаўся з нагляднымі скаргамі”, – кажа Эдуард Нелюбовіч. - Пасьля таго, як усе ўнутраныя сродкі праўнай абароны былі вычарпаныя, я прыняў рашэньне аб пошуку справядлівасьці на міжнародным роўні, – дадаў ён.

Актывіст просіць камітэт прызнаць факт парушэньня Рэспублікай Беларусь ягоных правоў у адпаведнасьці з артыкулам 19 (свабоднае выказванне ўласнага меркаваньня) і артыкулам 21 (свабода мірных сходаў) Міжнароднага Пакту аб грамадзянскіх і палітычных правах, а таксама рэкамэндацыяў ААН для ўладаў па прывядзеньні нацыянальнага заканадаўства аб масавых мерапрыемствах і практыкі ягонага прымяненьня ў адпаведнасьць з міжнароднымі абавязальніцтвамі краіны.

Праваабаронца Леанід Судаленка, які дапамог актывісту зьвярнуцца ў міжнародную інстанцыю адзначае, што па скаргах гомельскіх актывістаў Камітэт ААН па Правах Чалавека ўжо неаднаразова прымаў рашэньні, у якіх канстатаваў факты парушэньня правоў на мірныя сходы й як сьледзтва – на выказваньне меркаваньня.

“На сёньня міжнародныя экспэрты ў Жэнэве

8 разоў

прызнавалі парушэньнямі

права на мірныя сходы

забароны гомельскіх чыноўнікаў,

рэкамэндавалі ўраду Беларусі прывесьці нацыянальнае заканадаўства й практыку ягонага прымяненьня ў адпаведнасьць з сваімі міжнароднымі абавязальніцтвамі,

аднак беларуская ўлада пакуль паўтарае адно – рашэньні ААН носяць рэкамэндацыйны характар”, – заявіў юрыст.

P/S

Нагадаем, што ў пачатку 2015 году КПЧ ААН прыняў да разгляду скаргу Эдуарда Нелюбовіча па  фактах забаронаў гомельскімі чыноўнікамі пікетаваньняў у падтрымку палітзьняволенага Алеся Бяляцкага ды ягонага вылучэньня на Нобэлеўскую прэмію, а таксама вулічнага шэсьця ў падтрымку ўкраінскага народу й ягонага імкненьня жыць у Эўразьвязе.

Паводле Гомельская Вясна,
Падрыхтаваў Алесь ЛЕТА,
Беларускі Праўны Партал,
www.prava-by.info

Фота правабаронцы Леаніда Судаленкі: Аляксей Лапцікі, Lićviny-INFA

Цэтлікі: АГП, актывісты, Гамель, Гомельскі гарвыканкам, Гомельский горисполком, КПЧ ААН, Міжнародны Пакт аб Грамадзянскіх і Палітычных правах, Международный Пакт о гражданских и политических правах, Нелюбовіч спр. Беларусі, Нелюбович спр. Беларуси, ОГП, парушэньне права на мірныя сходы і свабоду выказваньня меркаваньняў (арт. 21 і арт. 19 МПГіПП), праваабаронцы, Эдуард Нелюбовіч, Эдуард Нелюбович