2009 12/08

Кіраўніку Берасьцейскай філіі “Маладога фронту” Міхасю Ільіну пагражаюць крымінальнай справай за ўдзел у незарэгістраванай арганізацыі.

Міхася Ільіна раней папярэджвалі, што супраць яго будзе распачата крымінальная справа, калі ён ня спыніць удзел у моладзевай арганізацыі. Раней яго выклікалі ў пракуратуру для дачы паказаньняў.

Сёньня супрацоўнікі міліцыі затрымалі Міхася а 6-й раніцы як толькі ён выйшаў з дому. Яго спачатку адвезьлі ў міліцыю, дзе пратрымалі тры гадзіны, а потым – у пракуратуру. Сувязь зь Міхасём адсутнічала. Паплечнікі маладафронтаўца палічылі, што супраць яго можа быць распачата крымінальная справа паводле 193-га артыкулу. Менавіта гэты артыкул унесьлі ў крымінальны кодэкс падчас прэзыдэнцкай выбарчай кампаніі 2006 года.

За ўдзел у незарэгістраванай арганізацыі адбывалі пакараньне за кратамі чацьвёра актывістаў арганізацыі “Партнэрства”, лідэр “Маладога фронту” Зьміцер Дашкевіч. Яшчэ 9 актывістаў “Маладога фронту” былі пакараныя штрафамі.

Сёньня ж пасьля размовы з пракурорам Берасьця кіраўніка Берасьцейскай філіі “Маладога фронту” Міхася Ільіна адпусьцілі.

Пракурор уручыў хлопцу прадпісаньне з папярэджаньнем пра тое, што ўдзел у незарэгістраванай арганізацыі “Малады фронт” будзе карацца паводле заканадаўства.

  • Праваабаронца з Жодзіна, Аляксей Лапіцкі, камэнтуе …

Alaksiej Lapicki– Такім чынам, чарговы раз можна ўбачыць, як скарыстоўваючы абсалютна ганебны для любой цывілізаванай краіны цалкам неправавы артыкул дзейснага заканадаўства, суб’екты праваахоўнай сыстэмы Беларусі, ігнаруючы сутнасьць агульнапрызнаных станлдартаў права, замацаваных у беларускай Канстытуцыі і Міжнародным Пакце аб грамадзянскіх і палітычных правах – апускаюцца да практыкі ідэалягічнага перасьледу й запалохваньня актывістаў грамадзянскай супольнасьці.

Нехта, верагодна, і сёньня мяркуе, што падобныя дыскрымінацыйныя меры – цалкам “законныя ці легальныя”, “дазволеныя ці санкцыяваныя ўладамі” (што ў разуменьні многіх ёсьць – сынонімамі правамернасьці). І яны – здольныя вынішчыць грамадзянскую ініцыятыўнасьць, натуральную для любога творчага, актыўнага, маючага ўласную жыцьцёвую пазыцыю чалавека, ягонае імкненьне да ўзаемадапамогі й салідарнасьці для вырашэньня супольных пытаньняў, праблемаў ці перашкодаў.

Запалохваньні, адміністратыўна-ідэаялягічны перасьлед і ўціск грамадзянскага актывізму па арт 193-1 КК Беларусі ў сукупнасьці з мэтанакіраванай ды сыстэмнай нерэгістрацыяй значных для грамадзтва НДА …, легітымізаваныя праз падобныя ганебныя артыкулы заканадаўства – ёсьць яскравымі атрыбутамі БЕЛАРУСКАГА ГУЛАГУ (які існуе й разьвіваецца ў цэнтры дэмакратычнай Эўропы), а таксама дзейснай дагэтуль практыкай пануючай тут КАЗАРМЕННА-АДМІНІСТРАТЫЎНАЙ, КІРУЕМАЙ ДЭМАКРАТЫІ і насаджаемага грамадзтву правільна-паліцэйскага й рабскага мэнталітэту.

І, як бы там не “глядзеў у сьвет” сучасны тэлевізыйны “палітрук Яўген Новікаў”, менавіта ён і падобныя яму ПРАВІЛЬНЫЯ СПЭЦЫ-ялісты, уся пануючая ў краіне аўтарытарная сыстэма ўлады праз практыкуемую антыканстытуцыйную манаполію на ПРАЎДУ – зьдзяйсьняюць сёньня і замацоўваюць у грамадзтве тую ПАДМЕНУ ПАНЯТКАЎ, якая працягвае падманваць, дэзарыентоўваць і падзяляць адзіны БЕЛАРУСКІ НАРОД.

Увесь гэты цалкам сумны й прымітыўны “спэктакаль” прыдуманы й рэалізуецца за НАРОДНЫЯ, бюджэтныя сродкі, але зусім не для паляпшэньня становішча з ПРАВАМІ ЧАЛАВЕКА, КУЛЬТУРАЮ ЦІ ЭКАНОМІКАЙ у краіне, не для лібэралізацыі й разьвіцьця рынкавых і дэмакратычных інстытуцыяў, а таксама чакаемых кожным з нас міру, стабільнасьці й дабрабыту, а ўсяго з адной мэтаю – забясьпечыць стабільны й няспынны працэс знаходжаньня ўва ўладзе постсавецка-спэцслужбаўскага кантынгенту альбо клану намэнклятуры …

Аднак, мір і спакой, стабільнасьць і дабрабыт …, як не круці, верагодныя толькі ў праўнай, дэмакратычнай і незалежнай, адроджанай культурна й цывілізацыйна для адзінае Эўропы й сусьвету Беларусі. Чым хутчэй мы ўсе гэта асэнсуем, возьмемся за рукі, як сябры ў цяжкія гадзіны …, тым хутчэй выратуем тое, што яшчэ можна выратаваць.
А самае галоўнае – уратуемся самі, уратуем нашыя душы, уласную чалавечую годнасьць, возьмем адказнасьць за ўласны лёс, за лёс нашых дзяцей і нашай краіны …

– Такія вось узьнікаюць разважаньні ў актывістаў супольнасьці, праваабронцаў … пасьля падобных навінаў і паведамленьняў …, пасьля судовых працэсаў …, у тым ліку й Вышэйшых, як над НАШАЙ ВЯСНОЮ …, якія зьяўляюцца відавочна замоўнымі й палітычна матываванымі, скіраванымі супраць рэгістрацыі грамадзкіх арганізацыяў, супраць праваабаронцаў, супраць нерэгістраванага гармадзянскага актывізму навогул, як адзінамагчымага ў цывілізаваным грамадзтве спосабу ўзьнікненьня, росту й фармаваньня любой грамадзкай арганізацыі ці ініцыятывы.

Паводле Радыё «Свабода»,
Алесь Вольны,
ПРАЎНЫ ПАРТАЛ,
by.prava-by.info

Leave a Reply

Your email address will not be published. Required fields are marked *

*