Не забірай жыцьцё!
2010 28/10
Зала паседжаньняў

Зала паседжаньняў

27.10.2010 увечары ў будынку Жодзінскага гарадзкога суду распачалося судовае разьбіральніцтва па справе Андрэя Зубры, якога абвінавачваюць у незаконным распаўсюдзе незалежнае прэсы ў Жодзіне, за што пагражае адміністратыўнае пакараньне ў выглядзе штрафу памерам ад 20 да 50 базавых велічыняў.

Праводзіў разьбіральніцтва дзяжурны на той час у будынку суда судзьдзя Грынкевіч. На паседжаньні прысутнічаў праваабаронца Аляксей Лапіцкі.

На пачатку працэса падсудны А.Зубра адразу заявіў некалькі хадайніцтваў, але ніводнае зь іх не было задаволена судом.
У прыватнасьці, судзьдзя Грынкевіч не задаволіў хадайніцтва Андрэя Зубры аб правядзеньні судовага паседжаньня на роднай мове. Не адмаўляючыся ў прынцыпе ад такой магчымасьці, тым не менш, спасылаючыся на існуючае дэ-факта двухмоўе й разуменьне ўсімі расейскае мовы, ён працягнуў праводзіць працэс па-расейску.

Прысутнаму на паседжаньні праваабаронцу й старшыні гарадзкой арганізацыі ТБМ імя Ф.Скарыны, Аляксею Лапіцкаму, таксама не было дазволена прадстаўляць інтарэсы падсуднага, які выказаў такое сваё жаданьне, як сябра ТБМ ці прыхільнік статутных мэтаў і задачаў гэтай арганізацыі, зьвязаных з распашырэньнем беларускае мовы ў розных жыцьцёвых асяродках, у тым ліку ў візуальным аздабленьні вуліцаў, а таксама праз распаўсюд беларускамоўных выданьняў.

У якасьці сьведкаў на паседжаньні выступілі двое супрацоўнікаў жодзінскай міліцыі. Яны распавялі як затрымлівалі Андрэя Зубру 27.09.2010 з пакункам незалежнага выданьня «Тут і цяпер» у пад’езьдзе жылога дому №10 па прашпэкце Міру ў Жодзіне.

Зь іхных паказаньняў вынікала, што малады чалавек, паводзіў сябе, на іхную думку, даволі дзіўна. Ён размаўляў, як яны сьведчылі, «не на чыстым беларускім языке» і нават прапаноўваў пачытаць беларускамоўнае выданьне, за якое яго затрымлівалі.

Міліцыянты, сказалі, што адмовіліся пачытаць газэту, але запэўнілі судзьдзю ў тым, што дадзенае выданьне выглядала, як «забароненае на нашай тэрыторыі». У якасьці аргумэнтаў яны адзначылі тое, што «выданьне надрукаванае па-беларуску, у выпуску былі заўважаны словы «прэзыдэнт» і «выбары», таму ўва ўсім гэтым адразу праглядаўся нейкі апазыцыйны падтэкст». Пры гэтым, сьведкі ў пагонах ня здолелі назваць колькасьць паасобнікаў у руках затрыманага, бо не палічылі неабходным пералічваць іхную колькасьць.

Паседжаньне завершылася амаль напрыканцы працоўнага дня й будзе працягнута а 10-00 у бліжэйшую пятніцу, 29.10.2010.

Як патлумачыў судзьдзя Грынкевіч, ён узяў перапынак і не выключае, што на новым паседжаньні яму прыйдзецца дапытаць дадатковых сьведкаў па справе.

Камэнтар правабаронцы:

– Бок падсуднага ўпэўнены ў тым, што любы грамадзянін Беларусі, краіны якая падпісала Міжнародны Пакт аб грамадзянскіх і палітычных правах, мае гарантаванае Канстытуцыяй і гэтай высокай міжнароднай дамовай права на безперашкодны распаўзсюд інфармацыі, свабоднае выказваньне розных думак, меркаваньняў, на свабоду перакананьняў.

І гэта есьць тым больш актуальным для беларускамоўных беларусаў у Беларусі, якія ўсё больш адчуваюць дыскрымінацыйны стан як нозьбіты беларускасьці ўва ўласнай краіне. Менавіта яны ў падобных умовах перакананыя й адчуваюць усё большую нутраную патрэбу ў неабходнасьці распашырэньня свабоднай інфармацыі на беларускай мове, бо разумеюць, што гэта спрыяе адраджэньню цікавасьці людзей да вольнае думкі й роднага слова.

Абмежаваньне дадзенага агульнапрызнанага права адпаведна МПГіПП (арт.18, п.3; арт. 19, п.3, а,б) і Канстытуцыі Рэспублікі Беларусь (арт. 23) на распаўсюд інфармацыі дапускаецца толькі на падставе закону (ясных, зразумелых, даступных і прадказальных правілаў) і павінна быць неабходным:
1) для павагі правоў і рэпутацыі іншых асобаў, а таксама для
2) аховы дзяржбясьпекі, грамадзкага парадку й здароўя ці нораваў насельніцтва.

Пры гэтым, перасьлед за перакананьні, у тым ліку па нацыянальнай і моўнай прыкмеце – абсалютна недапушчальная справа. А зыходзячы з таго, што свабода перакананьняў ёсьць правам (арт. 18 МПГіПП), якое аднесена да катэгорыі “use cogens”, яно адпаведна арт. 4 МПГіПП ня можа быць адмененым ці абмежаваным нават ва ўмовах надзвычайных і вайсковых становішчаў у краіне.

Безумоўна, перадвыбарчая эўрапейская Беларусь, абавязана выступаць гарантам правоў і свабодаў для сваіх грамадзянаў, рухацца да а не с ня можа нават параўноўвацца з падобнымі анамальнымі становішчамі.

Што тычыцца нашага выпадку, дык правапарушэньне з боку А.Зубры навогул выглядае надуманым. Пры гэтым, яно штучна змайстраванае на сьветапоглядна-ідэалягічных стэрыятыпах і тых абмежаваньнях, якімі кіруецца адміністратыўна-камандная сыстэма рэжымных установаў у краіне (ейныя выхаванцы праваахоўнікі), а не лёгіцы права й зразумелай, прадказальна празрыстай законнасьці дый правапарадку цывілізаванай эўрапейскай краіны.

Алесь Вольны,

Беларускі Праўны Партал,

by.prava-by.info

Leave a Reply

Your email address will not be published. Required fields are marked *


*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>