2013 15/05

Старшыня пастаяннай камісіі па дзяржаўным будаўніцтве, мясцовым самакіраваньні і рэглямэнце Палаты прадстаўнікоў Нацыянальнага сходу Аляксандар Зазуля ад імя дэпутатаў – сябраў камісіі падзякаваў Леаніду Сьвеціку за праяўленую ім ініцыятыву і актыўную жыцьцёвую пазыцыю. У цяперашні час ідзе падрыхтоўка законапраекту «Аб унясеньні зьменаў у Выбарчы Кодэкс Рэспублікі Беларусь», і праваабаронца накіроўваў у парлямэнт прапанову аб тым, якія зьмены, на яго думку, варта зрабіць.

У прыватнасьці, Леанід Сьвецік прасіў унесьці ў Выбарчы кодэкс азначэньне дзяржаўна-прававога статусу выбарчых камісіяў. У дзеючай цяпер рэдакцыі кодэксу такога азначэньня няма. Праваабаронца сьцьвярджае, што з-за гэтага парушаюцца правы і законныя інтарэсы грамадзян. Напрыклад, калі кіраўнік выбарчай камісіі не выконвае закон аб зваротах грамадзян і юрыдычных асоб, яго нельга прыцягнуць да адказнасьці, бо суды не прызнаюць за камісіямі нейкага юрыдычнага статусу: яны, маўляў, не зьяўляюцца арганізацыямі, а таму дзеяньне названага закону на іх не распаўсюджваецца.

«Дэпутаты – сябры пастаяннай камісіі, зьяўляючыся пасьлядоўнымі прыхільнікамі забесьпячэньня адкрытасьці і публічнасьці выбарчых дзеяньняў і працэдур, падзяляюць Ваша імкненьне да ўдасканаленьня выбарчага заканадаўства Рэспублікі Беларусь… Узьнятая ў вашым звароце праблема будзе ўзятая пад увагу дэпутатамі – сябрамі пастаяннай камісіі пры ўнясеньні ў Палату прадстаўнікоў законапраекту, які прадугледжвае карэктаваньне Выбарчага кодэксу Рэспублікі Беларусь»
, – паабяцаў старшыня камісіі Палаты прадстаўнікоў віцебскаму праваабаронцу.

Нагадаем, раней Леанід Сьвецік зьвяртаўся з аналягічнай прапановай у Цэнтральную выбарчую камісію, якая разам з Саўмінам і Нацыянальным цэнтрам заканадаўства і прававых дасьледаваньняў Рэспублікі Беларусь адказвае за падрыхтоўку законапраекту аб унясеньні зьменаў у выбарчы кодэкс. Аднак, у адрозьненьне ад парлямэнту, там прапанову, фактычна, праігнаравалі: старшыня ЦВК Лідзія Ярмошына паведаміла праваабаронцу, што ягоны зварот пакінуты без разгляду па сутнасьці.

“Віцебская Вясна”

Паводле licviny.info,
Падрыхтаваў Алесь ЛЕТА

Leave a Reply

Your email address will not be published. Required fields are marked *

*

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>